ನಮ್ಮೂರ ಆಟ - ಹೋಯಿತು ಎತ್ತ?    ೩/೩/೨೦೧೨

ಕಣ್ಣಾ ಮುಚ್ಚೆ, ಕಾಡೆ-ಗೂಡೆ,

ಉದ್ದಿನ ಮೂಟೆ ಉರುಳೇ ಹೋಯ್ತು...!

ಹೇಳೋರಿಲ್ಲ - ಕೇಳೋರಿಲ್ಲ,

"ಹುಯ್ಯೋ-ಹುಯ್ಯೋ ಮಳೆರಾಯನ?"

ಕೆರೆ-ದಡ, ಕಲ್ಲು-ಮಣ್ಣು,

ಕುಂಟಾ ಬಿಲ್ಲೆ - ಕಡ್ಡಿ ಆಟ;

ರತ್ತೋ-ರತ್ತೋ ರಾಯನ ಮಗಳೆ,

ಇಂದಾಗಿವೆ ಬರೀ ರಗಳೆ...!

ರಾಮ-ಭೀಮ-ಸೋಮ - ಚೂ ಚೆಂಡು,

ಲಗೋರಿ, ಗೋಲಿ, ಬುಗರಿ;

ಕಬಡ್ಡಿ, ಗಿಲ್ಲಿ-ದಾಂಡು,

ಹೋಗಾಯ್ತು ಮುಖ ಮುಚ್ಕೊಂಡು...!

ಅಳಿ-ಗುಳಿ, ಗಟ್ಟಾ-ಬಾರ (ಚೌಕಾ-ಬಾರ)

ಪಗಡೆ-ಕವಡೆ, ಪಚ್ಚಿ - ಟಿಕ್ಕಿ;

ಅಣ್ಣೆ ಕಲ್ಲು, ಅಡಿಗೆ-ಗುಡಿಗೆ,

ಅವಲಕ್ಕಿ-ಪವಲಕ್ಕಿ, ಗೆರೆ-ಚುಕ್ಕಿ...

ಸರಿದಾವೆ ದೂರದ ಬದಿಗೆ...!

ಎಲ್ಲೆಲ್ಲು ಈಗ -

ಫ಼ುಟ್ ಬಾಲ್, ವಾಲಿಬಾಲ್, ತ್ರೋಬಾಲ್

ಬೇಸ್ಬಾಲ್, ಹಾಕಿ, ಜಾಕಿ;

ಕ್ರಿಕೆಟ್-ಕ್ರಿಕೆಟ್-ಕ್ರಿಕೆಟ್...

ಏನಿದರ ಸೀಕ್ರೆಟ್?

ವಿಡಿಯೋ ಗೇಮ್,

ಮೀಡಿಯಾದ ಗಮ್,

ಎಲ್ರ ಕೈಲೂ ಮೊಬೈಲು -

ಎಲ್ಲೆಲ್ಲೂ ಇದ್ರದ್ದೇ ಐಲು...!

ಕಣ್ಣಾ ಮುಚ್ಚೆ, ಕಾಡೆ-ಗೂಡೆ

ಉದ್ದಿನ ಮೂಟೆ ಉರುಳೇ ಹೋಯ್ತು...!!!


ಹಪಮ